Láttu sjá þig!

SJÓR hefur ekki enn fengið heimild, frá Fiskistofu, til að halda mót. Það hafa verið haldnir sáttafundir sem formaður landsambandins (SJÓL), lögfræðingur Fiskistofu og starfsmaður atvinnuvega- og nýsköpunarráðuneytisins hafa setið. Einhver skriður komst á málin í maí og var Sjóstangaveiðifélagi Vestmannaeyja veitt leyfi til að halda sín mót. En eftir það hefur hvorki gengið né rekið í þessum málum og nú er óvíst um framhaldið. Vonandi tekst að leysa málið svo hægt verði að halda fleiri mót núna í sumar en ljóst er að einhver félög munu ekki treysta sér til að halda mót þótt leyfi fáist til þess.

Flottum Sjómannadegi er nú formlega lokið.

Líkt og í fyrra var SJÓR með bryggjuveiðina á sínum herðum og tókst hún mjög vel. Krakkarnir streymdu að, full af tilhlökkun. Það fór svo að sigurvegararnir voru tveir og þar að auki bræður, þeir Logi og Arnar Máni. Fyrir stærsta fiskinn fengu þeir glæsilegan verðlaunapening, í boði SJÓR. Allir þáttakendur fengu bíómiða í boði Laugarásbíó. Hér fyrir neðan er mynd af sigurvegurunum ásamt bryggjuveiðistjóranum, honum Steina.
SJÓR fékk veiðistangir lánaðar frá Ellingsen og kunnum við þeim bestu þakkir fyrir.

Við vorum með opið hús í Höllinni okkar og við fengum marga góða og áhugasama gesti í heimsókn. Við þökkum kærlega þeim sem komu og hjálpuðu okkur að gera daginn góðan.

Við verðum með opið hús á Sjómannadaginn og bjóðum gestum og gangandi að kíkja við, skoða veiðigræjur, fræðast um sjóstangaveiði og fá sér kaffisopa. Líkt og í fyrra munum við sjá um hina vinsælu bryggjuveiði fyrir krakka, sjá nánar á www.hatidhafsins.is

Á aðalfundi SJÓL sem haldinn var 13. maí síðastliðinn var kosin ný stjórn.

Þetta árið var kosinn nýr formaður til tveggja ára. Elín Snorradóttir fékk óskoraðan stuðning frá aðildarfélögunum en Elín hafði um árabil verið formaður Sjóstangaveiðifélags Reykjavíkur með góðum árangri og verið öflugur talsmaður fyrir íþróttinni.

Stefán B. Sigurðsson sem hafði verið formaður SJÓL síðustu 10 árin gaf ekki lengur kost á sér til formanns. Stefán mun vera stjórninni áfram innan handar í gegnum það kæruferli sem er í gangi gagnvart Fiskistofu, sem og öðrum málum er varðar störf formanns fyrst um sinn. Fyrir hönd allra félagsmeðlima óskum við Stefáni velfarnaðar og þökkum innilega fyrir allt það framlag sem Stefán hefur gefið af sér í gegnum árin.

Samhliða þessari breytingu var Sigurjón Már Birgisson, SJÓSKIP kosinn ritari og
Guðrún Rúnarsdóttir, SJÓAK gjaldkeri. Hvorugt þeirra hefur gegnt þessum stöðum áður en Sigurjón var áður gjaldkeri félagsins. Við bjóðum Guðrúnu velkomna og hlökkum til samstarfs með henni næstu misserin.

Nýr skoðunarmaður reikninga var einnig kosinn á fundinum og er það Hallgrímur Smári Skarphéðinsson formaður SJÓSIGL sem tekur við hlutverki Sigfúsar Karlsonar, SJÓAK.

Kæru félagar.

Eins og þið vitið kannski flest þá hefur gengið á ýmsu varðandi það að fá samþykktar veiðiheimildir fyrir sumarið 2017.

Fiskistofa telur að kostnaður við mótshald hjá sjóstangaveiðifélögunum í SJÓL sé ekki í samræmi við reglugerð um skráningu afla á opinberum sjóstangaveiðimótum og hefur á þeim grundvelli ákveðið að veita ekki leyfi til að halda sjóstangaveiðmót hjá aðildarfélögum Sjól í sumar. Einnig neitar Fiskistofa að taka til baka ákvörðun um afturvirk ákvæði o.fl.

Það má líka koma fram að þetta er ekki fyrsta árið sem sem þessi stofnun gerir ýmsar óvæntar breytingar og athugasemdir varðandi félögin og starfsemi þeirra.

SJÓL hefur, undanfarna mánuði, átt í ítrekuðum bréfaskiptum og fundahöldum við atvinnuvega- og nýsköpunarráðuneytið og Fiskistofu til að ná mætti sáttum svo mótin gætu farið fram.

Því miður hefur ekki orðið neinn árangur af þessum sáttaumleitunum og nú er svo komið að ákveðið hefur verið að fara í formlegt kæruferli og freista þess að fá ákvörðun Fiskistofu hnekkt, jafnframt að fá niðurstöðu í þau mál sem ágreiningur stendur um.

Það er ótrúlegt að staðan skuli vera þessi og við setjum inn tilkynningar um leið og eitthvað er að frétta af málinu.

Kveðja, stjórn SJÓR

Kæru félagar.

Þvi miður hefur Fiskistofa ekki úthlutað okkur veiðidögum, enn sem komið er og þ.a.l. ekkert hægt að ákveða með sumarið. Við látum vita um leið og málin skýrast. Þangað til brýnum við bara krókana og hnýtum flugur, er það ekki?